Miðvikudagur , 19. desember 2018

Bátadagar á Breiðafirði

Hinir árvissu bátadagar verða haldnir á Breiðafirði þann 6. og 7. júlí n.k. Það er Félag áhugamanna um Bátasafn Breiðafjarðar (FÁBB), sem gengst nú fyrir bátahátíð súðbyrtra trébáta á Breiðafirði í sjötta sinn.

Hinir árvissu bátadagar verða haldnir á Breiðafirði þann 6. og 7. júlí n.k. Það er Félag áhugamanna um Bátasafn Breiðafjarðar (FÁBB), sem gengst nú fyrir bátahátíð súðbyrtra trébáta á Breiðafirði í sjötta sinn.  Dagskráin verður með þeim hætti að þáttakendur safnast saman með báta sína á Reykhólum á föstudaginn 5. júlí. Laugardaginn 6. júlí verður siglt frá Reykhólahöfn kl. 10:00 og siglt NV með Reykjanesi um Staðareyjar og inn Þorska-, Gufu- og Djúpafjörð og aðstæður skoðaðar. Áð verður við Teigsskóg og hann skoðaður, síðan verður siglt til Staðar á Reykjanesi og lýkur ferðinni þar. Sunnudaginn 7. júlí verður farið kl. 10:00 frá Stað og siglt út í Sviðnur og deginum eytt með heimafólki sem fræðir um eyjuna og sögu hennar. Siglt til baka til Staðar og eru þar ferðalok. Gera má ráð fyrir að ferðin taki 6-8 klst. hvorn dag.

Að sjálfsögðu ráða aðstæður, sjávarföll og veður mestu um hvernig siglingarnar verða og áætlunin getur því breyst ef aðstæður krefjast. Siglingin verður undir stjórn manna sem þekkja vel til aðstæðna við Breiðafjörð. Formaður hvers báts er ábyrgur fyrir því að nauðsynlegur öryggisbúnaður sé fyrir hendi um borð.

Allir súðbyrðingar eru velkomnir.