Föstudagur , 21. september 2018

Inflúensa 2007

Kæru Hólmarar og nærsveitungar.
Komið er að árlegum pistli um inflúensu og bólusetningar.
En hvað er inflúensa?
Inflúensa er veirusýking sem einkennist af háum hita, þurrum hósta, höfuðverk, beinverkjum, oft með hálssærindum og nefrennsli. Einkennin koma snögglega. Árviss faraldur af völdum inflúensu A og oftast einnig af völdum inflúensu B hefst oft í desember eða janúar, en gera verður ráð fyrir að upphaf inflúensufaraldurs geti verið frá október til mars. Yfirleitt tekur 2-3 mánuði fyrir faraldur að ganga yfir.
Almennt má segja að þess háttar veikindi leggist þyngst á það fólk sem er af léttasta skeiði sem og þá sem hafa langvinna sjúkdóma.
Þeim sem er ráðlagt að láta bólusetja sig samkvæmt tilmælum landlæknis eru:
o Öllum sem orðnir eru 60 ára
o Öllum, bæði börnum og fullorðnum, sem þjást af langvinnum hjarta-, lungna-, nýrna- og lifrarsjúkdómum, sykursýki, illkynja sjúkdómum og öðrum ónæmisbælandi sjúkdómum.
o Starfsfólki heilbrigðisþjónustu og öðrum sem daglega annast fólk með aukna áhættu.
Þeir sem tilheyra ofangreindum hópum fá bóluefnið sér að kostnaðarlausu en greiða þó komugjald samkvæmt reglugerð nr. 1090 / 2006. Í síðasttalda hópnum á það einungis við um heilbrigðisstarfsmenn.
Hversu mikil vörn er í bólusetningu?
Búast má við að bólusetning geti veitt a.m.k. 70% vörn gegn sjúkdómnum auk þess sem hann verður vægari hjá þeim í hópi bólusettra sem veikjast. Sóttvarnalæknir leggur áherslu á að sem flestir verði bólusóttir, ekki síst þeir sem tilheyra forgangshópum.
Æskilegt er að inflúensubólusetningum sé lokið fyrir nóvemberlok til að folk sé komið með gott ónæmi fyrir sjúkdómnum þegar hann kemur.
Einnig má minna á að bólusetning við pneumokokkum (lungnabólgubakteríu) er fáanleg á heisugæslunni en sú vörn er ætluð öllum lungnaveikum sem og öldruðum sem þess óska.
Á næstu vikum verðum við á heisugæslunni með opna tíma fyrir bólusetningar og einnig verðum við liðleg við að koma í fyrirtækin sé þess óskað.
Verð fyrir aðra en áður var talið er samkvæmt gjaldskrá kr. 600 + komugjald.
Kveðja úr heilsugæslunni.
Brynja Reynisdóttir, hjúkrunarfræðingur