Föstudagur , 21. september 2018

Krafturinn engu líkur í söngbúðum

DSC05743 (2)Freyjukórinn hvetur allar syngjandi konur á Vesturlandi og víðar að taka þátt.

Öllum syngjandi konum á Vesturlandi og víðar stendur til boða að taka þátt í söngbúðum með djasssöngkonunni Kristjönu Stefánsdóttur.

Söngbúðirnar verða haldnar í Hjálmakletti í Borgarnesi helgina 12. til 13. mars og stendur skráning nú yfir. Þátttakendur munu læra og æfa söng undir stjórn Kristjönu Stefánsdóttur og Zsuzsönu Budai kórstjórnanda Freyjukórsins. Undirbúningur er í hámarki en stjórn Syngjandi kvenna annast undirbúning. Freyjukórinn í Borgarfirði stofnaði fyrst til þessa atburðar í mars árið 2012. Strax á fyrsta ári var þátttaka mjög góð. Konur úr öllum áttum streymdu að. Allt bendir til þess að þátttaka verði einnig mjög góð í ár.

Markmiðið er að efla sönggleði, þjálfa og hvetja konur til þátttöku í söngstarfi. Söngbúðirnar eru opnar öllum konum; ungum og öldnum, sem áhuga hafa á söng. Það er ekki skilyrði að hafa tekið þátt í kórastarfi.

Meðal laga sem æfð verða eru: Perfect – Fairground Attraction, The tide is high, Stairway to heaven, Boy from New York City, Rolling in the deep, Irish blessing, Líttu sérhvert sólarlag, Eitthvað undarlegt, Hudson bay, Umvafinn englum, svo eitthvað sé nefnt.

Mikil samstaða og gleði hefur skapast milli þátttakenda og krafturinn engu líkur. Hvetjum konur til að taka þátt og skrá sig sem fyrst á vefnum: vefurinn.is/freyjur. Einnig er hægt að senda beiðni um frekari upplýsingar í netfangið syngjandikonur@gmail.com

Söngbúðirnar enda með tónleikum í Hjálmakletti í Borgarnesi. Þær konur sem geta fara síðan á flakk með hópnum og syngja í Grundarfirði miðvikudagskvöldið 16. mars og til Hólmavíkur laugardaginn 19. mars.