Laugardagur , 25. nóvember 2017

Fuglaskoðun og fleiri fréttir

Næsta laugardag, 10. júní, verður fuglaskoðun við Þúfubjarg á vegum Þjóðgarðsins. Lagt verður af stað frá bílastæðinu við Svalþúfu/Þúfubjarg kl. 11:00 og mun Sæmundur Kristjánsson leiðbeina fólki um fuglana.

Næsta laugardag, 10. júní, verður fuglaskoðun við Þúfubjarg á vegum Þjóðgarðsins. Lagt verður af stað frá bílastæðinu við Svalþúfu/Þúfubjarg kl. 11:00 og mun Sæmundur Kristjánsson leiðbeina fólki um fuglana. Þessa dagana er líf og fjör hjá bjargfuglunum og gaman að fylgjast með þeim. Þetta er ferð fyrir alla aldurshópa og fólk hvatt til að hafa með sér kíki ef það á.

     Laugardaginn 20. maí sl. var nýja göngubrúin yfir Móðulæk formlega tekin í notkun. Fulltrúar þeirra sem nota munu brúna í framtíðinni, systurnar Ída Anita og Íris Linnéa Tryggvadætur, klipptu á borðann með aðstoð Sæmundar Kristjánssonar sem smíðaði brúna. Eftir athöfnina var gengið eftir Hólastíg að Gufuskálum en leiðin var stikuð síðasta sumar.

     Landverðir eru farnir að koma til starfa og eru nú þrír þeirra komnir. Fleiri bætast síðar í hópinn en alls munu sex landverðir starfa í þjóðgarðinum í sumar, þar af tveir þeirra aðeins í tvær vikur. Fjórir landvarðanna hafa unnið áður í Þjóðgarðinum.

     Þjóðgarðurinn vill hvetja fólk til að taka þátt í fjölbreyttri dagskrá sumarsins. Á næstunni er refaskoðun fyrirhuguð 18. júní og um Jónsmessuna verður helgiganga í samstarfi við Ingjaldshólskirkju. Föst dagskrá hefst síðan 27. júní. Betur verður sagt frá ferðunum síðar.

Gestastofan á Hellnum var opnuð í lok maí og er opin alla daga frá kl. 10-18.