Kvittað og klárt

Eins og sagt var frá í Stykkishólms-Póstinum sem kom út í gær, þá stefndi í undirritun samnings við Heilbrigðisráðuneytið um hjúkrunarrými í Stykkishólmi. Undirritunin fór fram í gær og voru eftirfarandi myndir teknar við það tilefni.

Frá vinstri: Sveinn Bragason, Bryndís Þorvaldsdóttir, Lárus Ástmar Hannesson, Svandís Svavarsdóttir, Sturla Böðvarsson og Hafdís Bjarnadóttir

Fréttatilkynning frá ráðuneytinu:

„Svandís Svavarsdóttir heilbrigðisráðherra og Sturla Böðvarsson bæjarstjóri undirrituðu í dag samning um endurbætur og uppbyggingu á hjúkrunarrýmum í húsnæði Heilbrigðisstofnunar Vesturlands í Stykkishólmi.

Áætlaður kostnaður við framkvæmdir vegna hjúkrunarrýmanna er um 590 milljónir króna og skiptist þannig að ríkissjóður fjármagnar 83% framkvæmdanna á móti 17% sveitarfélagsins.

Vinna við áætlanagerð, hönnun og annan undirbúning hefst á næstu vikum. Áætlað er að framkvæmdir hefjist í byrjun næsta árs og taka megi heimilið í notkun í lok árs 2021.

Á heimilinu verða 18 hjúkrunarrými sem leysa af hólmi dvalar- og hjúkrunarrými sem rekin hafa verið annars vegar í húsnæðis Heilbrigðisstofnunar Vesturlands í bænum og hins vegar í Dvalarheimili aldraðra Stykkishólmi.“