Laugardagur , 23. september 2017

Orgeltónleikar á sunnudag

Organistinn Sigrún Magna Þórsteinsdóttir leikur á orgel Stykkishólmskirkju n.k. sunnudag. Sigrún Magna er organisti við Akureyrarkirkju og hlaut Listamannalaun í fyrra. Hún hefur rannsakað orgeltónlist eftir konur og eru tónleikarnir á sunnudaginn hluti af því verkefni. Sigrún hefur haldið tónleika á Íslandi er erlendis sem einleikari, meðleikari og kórstjóri. Tónleikarnir hefjast kl. 13.30 á sunnudaginn og er ókeypis aðgangur og allir velkomnir.

Sigrún Magna Þórsteinsdóttir stundaði tónlistarnám í Tónlistarskólanum á Akureyri, Tónlistarskólanum í Reykjavík, við Tónskóla þjóðkirkjunnar og í Konunglega danska tónlistarháskólanum í Kaupmannahöfn. Þaðan lauk hún meistaraprófi í kirkjutónlist undir handleiðslu prof. Bine Bryndorf. Í námi sínu lagði hún sérstaka áherslu á barnakórstjórn, tónlistaruppeldi barna og kenningar um tónlistarþroska barna. Hún heldur reglulega tónlistarnámskeið fyrir foreldra ungbarna.

Sigrún hefur starfað sem organisti og kórstjóri í Reykjavík, í Kaupmannahöfn og á Akureyri. Sigrún starfar nú sem  organisti  við Akureyrarkirkju, við Möðruvallaklausturskirkju í Hörgárdal og kennir við Tónlistarskólann á Akureyri. Hún hefur haldið fjölda tónleika á Íslandi og erlendis bæði sem einleikari, meðleikari og kórstjóri. Sigrún hefur sótt fjölda námskeiða m.a. hjá Olivier Latry, Hans-Ola Ericsson, Michael Radulescu og Mattias Wager. Sigrún er framkvæmdastjóri Sumartónleika í Akureyrarkirkju og Kirkjulistaviku í Akureyrarkirkju.

Sigrún fékk úthlutað listamannalaunum frá íslenska ríkinu árið 2016 og eru tónleikarnir hluti af því verkefni.