Þriðjudagur , 20. nóvember 2018

Slæmt ástand bryggjunnar í Flatey

Ein af verst förnu undirstöðunum. Mynd: Hafþór Ingi Þorgrímsson

Á aðalfundi Framfarafélags Flateyjar 2017 skoraði félagið á ráðherra samgöngu- og sveitarstjórnarmála, sveitarstjórn Reykhólahrepps og samgöngusvið Vegagerðarinnar að vinna að endurbótum ferjubryggjunnar í Flatey á Breiðafirði. Greint er frá þessu á heimasíðu Framfarafélagsins, Flatey.com.

Í ályktuninni segir að ástand bryggjunnar hafi versnað gífurlega undanfarin ár og að nú sé hluti bryggjunnar stórskemmdur.

„Farþegafjöldi með ferjunni Baldri hefur aukist í takt við aukinn ferðamannastraum á Íslandi og álag á innviði eyjarinnar í réttu hlutfalli. Ferjan kemur allt að 4 sinnum að bryggju á dag yfir sumartímann en sjaldnar á veturna. […] Ekki er hægt að horfa fram hjá þeirri staðreynd að verið er að leggja líf og limi fólks í hættu þar sem ástand bryggjunnar er algjörlega óviðunandi.”

Félagið vekur athygli á því að staðið hefur til að gera gangskör í sjóvörnum í Flatey og hafi þegar fengist einhverjir fjármunir til þess en ekkert hefur verið gert í þeim málum.

„Erfitt hefur verið að stunda veiðar og ferðamennsku út frá Flatey vegna lélegrar hafnaraðstöðu.”

Á fundi sveitarstjórnar Reykhólahrepps 11. apríl var ályktunin tekin fyrir. Í fundargerð stendur: „Sveitarstjórn Reykhólahrepps hefur ekki rekið Flateyjarhöfn svo áratugum skiptir, hefur hún alfarið verið rekin af siglingasviði Vegagerðarinnar, áður Siglingastofnun, að því er sveitarstjórn telur sem ferjuhöfn vegna Breiðafjarðarferjunnar Baldurs. […]

Sveitarstjóra er falið að útbúa yfirlýsingu til Innanríkisráðuneytisins þess efnis að sveitarfélagið sé reiðubúið að afsala sér formlega öllum hafnarmannvirkjum í Flatey og rekstri á höfninni í Flatey til Vegagerðarinnar. Samþykkt samhljóða.”

 

Ályktun Framfarafélagsins má lesa í heild sinni hér að neðan:

Undanfarin ár hefur ástand ferjubryggjunnar í Flatey versnað gífurlega og er nú svo komið að hluti bryggjunnar er stórskemmdur. Fulltrúar FFF hafa setið fundi með siglingasviði Vegagerðarinnar og sveitarstjórn til að ræða alvarlegt ástand hennar og komið á framfæri við starfsmenn Vegagerðarinnar upplýsingum s.s. myndum og myndböndum sem sýna lélegt ástand bryggjunnar. Þar að auki hefur sveitarstjórn Reykhólahrepps og útgerð ferjunnar Baldurs margoft bent á ástand bryggjunnar við Vegagerðina og þingmenn kjördæmisins.

Mynd: Hafþór Ingi Þorgrímsson

Farþegafjöldi með ferjunni Baldri hefur aukist í takt við aukinn ferðamannastraum á Íslandi og álag á innviði eyjarinnar í réttu hlutfalli. Ferjan kemur allt að 4 sinnum að bryggju á dag yfir sumartímann en sjaldnar á veturna. Vegna bágs ástands ferjubryggjunnar treysta skipstjórnarmenn sér ekki til að leggja að í Flatey í ákveðnum veðurskilyrðum með þeim afleiðingum að oft falla farþegaflutningar og póstsamgöngur niður. Ekki er hægt að horfa fram hjá þeirri staðreynd að verið er að leggja líf og limi fólks í hættu þar sem ástand bryggjunnar er algjörlega óviðunandi.

Rétt er að vekja athygli á að í all mörg ár hefur staðið til að gera gangskör í sjóvörnum í Flatey og hafa einhverjir fengist fjármunir til þess en ekkert verið gert í þeim málum. Samhliða hefur Reykhólahreppur skipulagt smábátahöfn sem myndi tengjast ferjubryggjunni í samvinnu við heimamenn og samgöngusvið Vegagerðinnar. Erfitt hefur verið að stunda veiðar og ferðamennsku út frá Flatey vegna lélegrar hafnaraðstöðu.