Eyrarrósin afhent í Frystiklefanum

Eyrarrósin 2016-2
Kári Viðarsson að segja frá starfsemi Frystiklefans.
Eyrarrósin 2016
Árni Gunnarsson, framkvæmdastjóri Flugfélags Íslands, Aðalsteinn Þorsteinsson, forstjóri Byggðastofnunar, Hanna Styrmisdóttir, listrænn stjórnandi Listahátíðar í Reykjavík, Herdís Sæmundardóttir, stjórnarformaður Byggðastofnunar, Kristín Jóhannsdóttir, forstöðukona Eldheima, Mireya Samper, stjórnandi Ferskra vinda, Gústav Geir Bollason, einn af stofnendum Verksmiðjunnar, Ragnheiður Jóna Ingimarsdóttir, menningarfulltrúi Eyþings og Þórunn Sigurðardóttir, stjórnarformaður Listahátíðar í Reykjavík.

Verksmiðjan á Hjalteyri er handhafi Eyrarrósarinnar 2016 en hún er árlega veitt framúrskarandi menningarverkefni á landsbyggðinni. Aðstandendur Verksmiðjunnar veittu viðurkenningunni móttöku við athöfn í Frystiklefanum á Rifi fimmtudaginn 18. febrúar en Frystiklefinn er einmitt handhafi Eyrarrósarinnar 2015.

Verksmiðjan á Hjalteyri er listamiðstöð með sýningarsali og gestavinnustofur í gamalli síldarverksmiðju Kveldúlfs við Eyjafjörð. Frá því að nokkrir frumkvöðlar og listamenn tóku sig saman og stofnuðu Verksmiðjuna árið 2008 hefur þar verið haldið úti framsæknu myndlistar- og menningarstarfi.

Verðlaunin sem Verksmiðjan hlýtur er fjárstyrkur að upphæð 1.650.000 auk flugmiða frá Flugfélagi Íslands. Forsvarsmenn alþjóðlegu listahátíðarinnar Ferskra vinda í Garði og Eldheima í Vestmannaeyjum, sem einnig voru tilnefnd, tóku hvort um sig við 300 þúsund króna fjárstyrk, auk flugmiða.

Til stóð að Dorrit Moussaieff forsetafrú afhenti verðlaunin, en hún hefur verið verndari Eyrarrósarinnar frá upphafi, eða í tólf ár. Hún forfallaðist vegna veikinda og því afhenti Þórunn Sigurðardóttir, stjórnarformaður Listahátíðar í Reykjavík, verðlaunin fyrir hönd forsetafrúarinnar. Bæjarstjóri Snæfellsbæjar, Kristinn Jónasson, ávarpaði samkomuna og það gerði einnig Hanna Styrmisdóttir, listrænn stjórnandi Listahátíðar í Reykjavík. Kári Viðarsson sagði gestum frá sögu Frystiklefans, fór yfir það helsta sem hefur verið gert og eins það sem er á döfinni.
Það var Gústav Geir Bollason, umsjónarmaður Verksmiðjunnar á Hjalteyri, sem veitti verðlaununum
viðtöku. Eyrarrósin var fyrst afhent árið 2005 og féll þá í hlut Þjóðlagahátíðarinnar á Siglufirði.
Sú hefð hefur skapast á undanförnum árum að verðlaunaafhendingin fari fram í höfuðstöðvum verðlaunahafa síðasta árs. Sami háttur var hafður á nú og því voru verðlaunin veitt í Frystiklefanum á Rifi.

 

Bæjarblaðið Jökull