Fimmtudagur , 23. nóvember 2017

Míla hefur lokið uppsetningu Ljósnets í Stykkishólmi

Eftirfarandi tilkynning barst frá Mílu:

Síðustu vikur hefur Míla unnið að uppsetningu Ljósnets til heimila í Stykkishólmi og hefur þeim áfanga nú verið náð að nánast öll heimili í Stykkishólmi eru orðin tengd Ljósneti. Þar með geta heimilin fengið háhraðanetstengingu um Ljósnetið en til þess þarf að hafa samband við sitt fjarskiptafyrirtæki og panta þjónustuna. Öll fjarskiptafyrirtæki á markaði geta boðið þjónustu til notenda um kerfi Mílu.

Ljósnet er tenging sem byggir á svokallaðri VDSL-tækni. Ljósleiðari er tengdur alla leið í götuskáp/símstöð í nágrenni við heimilin og þar er settur upp búnaður sem tryggir hraða um koparendann, sem notaður er síðasta spölinn inn til notanda. Hraðinn sem fæst með Ljósneti í Stykkishólmi nægir auðveldlega fyrir 2-3 háskerpu sjónvörp, til að vafra á netinu, spila tölvuleiki yfir netið, hlusta á tónlist og horfa á sjónvarpsveitur, allt á sama tíma, án truflana.

Fyrir hefur verið settur upp VDSL búnaður í símstöðvum á öllum þéttbýlisstöðum á landinu. Sumstaðar dugir þessi búnaður til að þjóna öllum heimilum á staðnum, en þar sem vegalengdir frá símstöð til heimila eru of miklar, eru settir upp götuskápar fyrir VDSL búnaðinn og þjóna þeir hlutverki símstöðvar fyrir heimilin í nágrenni við hann. Misjafnt er hversu marga skápa þarf að setja upp til að ná til allra heimila. Nú þegar hefur Míla klárað að ljósnetsvæða marga þéttbýlisstaði víðsvegar um landið og er stefnt á að því verkefni verði lokið að mestu fyrir lok þessa árs.

Ljósnet er einfaldasta og fljótlegasta leiðin til að koma háhraðanetstengingum til sem flestra og er það orðið aðgengilegt yfir 90% heimila á Íslandi. Með lagningu Ljósnetsins er að auki kominn ljósleiðari í nágrenni við öll heimili og auðveldar það framkvæmd á næsta skrefi í þróuninni sem verður að bjóða notendum ljósleiðara alla leið.