Fimmtudagur , 23. nóvember 2017

Northern Wave á Rifi

Alþjóðlega kvikmyndahátíðin Northern Wave verður haldin helgina 21.-23. október næstkomandi í Frystiklefanum á Rifi. Þetta er í níunda sinn sem hátíðin er haldin en hingað til hefur hún farið fram í Grundarfirði. Með auknum ferðamannastraumi reyndist erfitt að fá nægt gistipláss fyrir gesti hátíðarinnar í Grundarfirði og hefur hátíðin því verið færð í Snæfellsbæ.

Gestir hátíðarinnar munu gista í ólíkum bæjarfélögum á svæðinu en hátíðin mun bjóða upp á skutlþjónustu á milli staða. Í ár hefur verið lögð mikil áhersla á að búa til skemmtilega dagskrá fyrir börn en hátíðin fer fram um vetrarfríshelgi grunnskólabarna. Boðið verður upp á sérstaka dagskrá mynda fyrir börn, hreyfimyndanámskeið, en afraksturinn verður sýndur á hátíðinni og að lokum verða sýndar skrípómyndir á 8mm sýningarvél en krökkum verður boðið að prófa að þræða vélina sjálf. Hægt er að skrá börn á hreyfimyndanámskeiðið með því að senda tölvupóst á info@northernwavefestival.com eða hringja í síma 770-0577.

Fyrir utan metnaðarfulla sýningu á yfir sextíu alþjóðlegum stuttmyndum, íslenskum tónlistarmyndböndum og stuttmyndum býður hátíðin upp á tónleika, fyrirlestur og að lokum fiskiréttasamkeppni. Fiskiréttakeppnin hefur slegið í gegn en þar fá bæjarbúar tækifæri til að flagga því góða hráefni sem framleitt er á staðnum, þ.e.a.s. fisknum og keppa sín á milli um besta fiskiréttinn eða súpuna. Í ár langar okkur til að hvetja fólk í veitingarrekstri á svæðinu til að koma með rétt. Hrefna Rósa Sætran dæmir keppnina en í verðlaun er Dekurgjafabréf fyrir tvo á Hótel Búðir að verðmæti 53.900 kr. og gjafabréf fyrir tvo út að borða á Fisk- eða Grillmarkaðinn.

Skráning fer fram á heimasíðu hátíðarinnar: www.northernwavefestival.com eða á info@northernwavefestival.com.

Nokkrir tónlistarmenn munu spila á hátíðinni og fylgja þannig eftir tónlistarmyndböndum sínum en nú þegar hafa Védís Hervör, Futuregrapher, Chryptochrome og Bláskjár staðfest að þau muni spila á hátíðinni.

Heiðursgestur hátíðarinnar verður leikkonan Ilmur Kristjánsdóttir sem ætti að vera öllum Íslendingum góðkunn en erlendir gestir hátíðarinnar ættu að kannast við hana úr þáttaröðinni Ófærð. Ilmur mun sitja fyrir svörum á hátíðinni og ræða sína reynslu af kvikmyndagerð, sem leikkona en líka sem handritshöfundur.

Fyrst birt í Bæjarblaðinu Jökli 06/10/16