Þriðjudagur , 24. október 2017

Endurbættur Hamar kominn heim


Hamar SH 224 kom til heimahafnar í Rifi á dögunum. Báturinn hefur verið í Gdansk í Póllandi undanfarið og hafa miklar endurbætur verið gerðar á honum. Kristinn J. Friðþjófsson ehf. á Rifi á Hamar SH og gerir hann út ásamt öðrum bát. Það sem gerir endurbæturnar mjög svo sérstakar er að hér er um að ræða 53 ára gamalt skip en Hamar SH var smíðaður í Shelbý í Englandi og er mjög óvanalegt að farið sé út í svona miklar endurbætur á svo gömlum bátum. Framkvæmdastjóri Kristins J. Friðþjófssonar, Halldór Kristinsson segir að þeir hafi farið í þessar framkvæmdir því þeir hafi vitað hvað þeir voru með í höndunum. Verkið var unnið eins og áður segir í Gdansk af skipasmíðastöðinni Alkor.

Báturinn var sandblásin alveg frá kili og upp í mastur. Skipt var um lestargólf og öll lestin tekin í gegn og einangruð, einnig var sett í hann nýtt stýri. Öll togspil voru tekin úr skipinu og betrumbætt til línuveiða auk annars.

Stakkhamar sem er hinn báturinn sem Kristinn J. Friðþjófsson ehf. gerir út hefur verið við veiðar úti af Norðurlandi og landað á Siglufirði. Fiskvinnslan Sjávariðjan er einnig í eigu sömu aðila og þar vinna um 23 starfsmenn.

Að sögn Halldórs byggir Kristinn J. Friðþjófsson ehf. á gömlum grunni, hafa þau varað sig á því að skuldsetja fyrirtækið ekki um of og að sé fyrirtækið að því leytinu ágætlega statt þó að hjá þeim eins og öðrum litlum sjávarútvegsfyrirtækjum valdi hátt gengi krónunnar ásamt lágu afurðaverði og veiðigjöldum erfiðleikum. Fyrirtækið gerði áður einnig út tvo aðra báta Sæhamar og Litla-Hamar en seldi þá og færði aflaheimildirnar af þeim yfir á Stakkhamar. Veiðir hann því um 1.000 tonn á ári og er Hamar SH með jafn miklar aflaheimilidir.

Allur afli af bátunum er unnin í fiskvinnslu fyrirtækisins Sjávariðjunni. 60% aflans fer í ferskan fisk en fyrir tveimur árum var hún endurnýjuð og er hún meðal annars búin vatnskurðarvél. Stakkhamar hefur veitt vel undanfarið en hann fór í slipp fyrir norðan um verslunarmannahelgina og fór síðan beint á veiðar fyrir norðan. Hefur hann séð vinnslunni fyrir
þorski á meðan Hamar var í Póllandi. En undanfarin ár hefur
Stakkhamar aðallega veitt löngu á haustin og er stefna að því að hann komi vestur á næstunni og verði við veiðar heimafyrir. Ef ekkert verður að gert
hvað varðar veiðigjöldin, gengi krónunnar fer ekki að lagast og afurðaverð hækkar ekki segist Halldór ekki vera bjartsýnn fyrir hönd smærri útgerðarfyrirtækjanna og sé því einsýnt að einstaklingsútgerðum fækki
verulega á næstu tveimur árum. Sérstaklega þegar farið verði að gera upp eftir fyrstu mánuðina í fiskveiðiárinu muni menn sjá að það er lítil ástæða til annars en að pakka saman og hætta. Halldór segir þó að þau hafi gaman að þessu og að meðan þau geti ráðið sér sjálf séu þau ekki að fara að hætta.

þa