Fimmtudagur , 20. september 2018

Hólmari í ungmennaráði Menntamálastofnunnar

Sara er hér þriðja frá hægri í annari röð
Sara er hér fjórða frá hægri í annari röð

Sara Rós Hulda Róbertsdóttir, nemandi í 10. bekk í GSS, hefur verið tilnefnd sem fulltrúi í ungmennaráði Menntamálastofnunnar. Var hún tilnefnd af ungmennaráði Sambands íslenskra sveitarfélaga.

Foreldrar Söru eru þau Róbert Stefánsson og Menja von Schmalensee.

Í ungmennaráði Menntamálastofnunnar eru 22 ungmenni á aldrinum 14-18 ára. Skiptast þau í 12 stúlkur og 10 drengi sem koma alls staðar að af landinu. Voru þau tilnefnd af samstarfsaðilum Menntamálastofnunnar í kjölfar samráðsfundar í vor með fulltrúum úr ýmsum starfandi ungmennaráðum. Í framhaldi af fundinum óskaði Menntamálastofnun eftir tilnefningum frá þessum sömu aðilum (Barnaheillum, SAFT, Samfés, Unicef, umboðsmanni barna, UMFÍ og Sambandi íslenskra sveitarfélaga) og í framhaldinu var ráðið sett á fót.

Ungmennaráðið kemur til með að vera Menntamálastofnun innan handar með ráðgjöf um málefni og verkefni sem varða ungmenni. Sem dæmi um málaflokka sem ráðið kemur að má nefna útgáfu námsefnis, námsmat, innritun o.fl.

Þá verður ráðið stofnuninni einnig innan handar í einstökum verkefnum ef tími og aðstæður leyfa. Þau sitja fundi, málþing eða ráðstefnur á vegum Menntamálastofnunnar og halda þar erindi, skrifa greinar í blöð og funda með ráðamönnum svo fátt eitt sé nefnt sem fram kemur í tilkynningu.