Miðvikudagur , 14. nóvember 2018

Skinkuhorn Guðrúnar

Ég þakka Maríusi áskorunina, og langar að deila með ykkur uppskrift af skinkuhornum sem við vinkonurnar bökum saman fyrir jólin og markar upphafið af  jólaundirbúningnum hjá okkur.

Uppskrift:

5 ½ – 6 dl hveiti

50 gr smjörlíki

1 tsk salt

1 tsk sykur

35 gr pressuger eða 3 ½ tsk þurrger

2 dl vatn ( ylvolgt)

Við látum 1 matsk kúmen í deigið

 

Fylling:

150 gr. Skinka söxuð

100 gr smurostur

2 matsk púrrulaukssúpa

 

Allt hrært saman.

 

Setjið þurrefnin í skál, myljið smjörlíkið út í, setjið ylvolgt vatnið út í , hnoðið og látið hefast. Hnoðið deigið jafnt og gljáandi, skiptið því í tvennt eða þrennt og búið til bollur.

Fletjið bollurnar út í kringlóttar kökur og skerið með kleinujárni í 8 þríhyrninga, og setjið fyllinguna á og vefjið hornin, setja á plötu, smyrjið með eggi eða vatni og stráið kúmeni á.

Bakað í miðjum ofni við 225°c í 8-10 mín. Það er gott að eiga þessi horn í frysti og hita í ofni . Verði ykkur að góðu.

 

Ég ætla að skora á vinkonu mína Ölmu Diegó að koma með næstu uppskrift, ég veit að hún lumar á einhverju góðgæti til að deila með okkur.

 

Bestu kveðjur.

Guðrún Gunnlaugsdóttir