Fimmtudagur , 23. nóvember 2017

Uppskrift – Pekan-pie

Takk fyrir áskorunina elsku Herdís.

Ég ætla að koma með æðislega pekan pie frá Ebbu frænku.

Innihald:

180g spelt (gróft og fínt til helminga)

80g kalt smjör í bitum

50ml (1/2 dl) kalt vatn (meira ef þarf)

250g döðlur (steinlausar)

60g smjör

80g kókospálmasykur

3 egg

250g saxaðar pekan hnetur

 

Aðferð:

Hitið ofninn í 180°C. 

Byrjið á botninum: 

Blandið speltinu saman (fínu og grófu) og bætið svo smjörinu í bitum við. Náið þessu saman með höndunum. Bætið svo fljótlega við vatni og smám saman verður þetta að deigi.

Setjið smá fínt spelt á borðið og fletjið út deigið hringlaga og leggið það svo í eldfast mót (ca. 24cm). Reynið að setja kantana aðeins upp, og jafnið þá með fingrunum, það er fallegra. Setjið botninn í frysti á meðan þið gerið fyllinguna.

 

Fyllingin: 

Setjið döðlurnar í pott með 3 matskeiðum af vatni. Hitið aðeins döðlurnar svo þær mýkist vel. Þið getið látið þær bíða svo í hitanum í pottinum (slökkt undir), með lokið á, í nokkrar mínútur ef þið hafið tíma. Saxið pekan hneturnar gróft og skiljið eftir nokkrar heilar til að skreyta bökuna með. Blandið svo saman í blandara eða með töfrasprota döðlunum, smjörinu, kókospálmasykrinum og eggjunum.

Takið botninn úr frysti og raðið söxuðu pekanhnetunum yfir botninn, setjið svo fyllinguna og skreytið svo í lokin efst, með heilum pekan hnetum.

Bakið bökuna í um 30 mínútur.

Mæli svo með að kakan sé borðuð með ís og helst í miklu magni.

Ég ætla svo að skora á Ebbu frænku að koma með eitthvað rosalega gott í næsta blað.

-Ólöf Rún Ásgeirsdóttir