Miðvikudagur , 19. september 2018

Æfing og mót hjá SamVest

hsh_merki_rgbFöstudaginn 22. apríl sl. var haldin samæfing í frjálsum íþróttum á vegum Sam-Vest.
SamVest er samstarf í frjálsum íþróttum milli sjö héraðssambanda á Vesturlandi, sunnanverðum Vestfjörðum og Ströndum.
Fyrir ári sömdu SamVest og frjálsíþróttadeild FH um samstarf og eru samæfingar nú haldnar 3svar á vetri í nýju frjálsíþróttahöllinni í Kaplakrika í Hafnarfirði. Frjálsíþróttaþjálfarar FH aðstoða sem gestaþjálfarar á þessum æfingum, sem eru yfirleitt fyrir 10 ára og eldri.
Um 25 krakkar mættu á samæfinguna sl. föstudag og stóð hún í tæpar 3 klst. með upphitun, nestispásu og teygjum í lok æfingar. Krakkarnir fengu að æfa spretthlaup og grindahlaup, langstökk, hástökk, kúlu, spjót og kringlu, en hópnum er skipt í þrennt eftir aldri.
Laugardaginn 23. apríl kl. 11.00 var svo haldið Vinamót á vegum SamVest, HSK-Selfoss og FH.
Mótið var haldið í Kaplakrika og gafst iðkendum SamVest þar tækifæri til að spreyta sig og fá árangur sinn skráðan. Mótið var fyrir 11-14 ára og voru margir að mæta á sitt fyrsta mót. Tólf þátttakendur voru frá SamVest af um 80 keppendum mótsins. Sjá má úrslit mótsins í mótaforriti FRÍ, en skv. því má sjá að margir voru að bæta sinn persónulega árangur.
Á mótinu bætti Birta Sigþórsdóttir úr Stykkishólmi héraðsmet HSH í kúluvarpi innanhúss í flokki 13 ára stúlkna með 2 kg kúlu. Hún kastaði 12,31 m en héraðsmetið innanhúss átti hún sjálf síðan í nóvember sl. þegar hún kastaði 12,17 m og bætti þá bæði metið í flokki 12 og 13 ára.